我哋搵Video都真係比較過好多唔同公司，Henry 佢哋最大既方便就係拍啲嘢好真實得嚟電影感都好重！感覺好professional，好 flexible 而且睇得到佢哋包容到好大既創作空間。當時傾既時候都已經感覺到佢哋好尊重我哋既意見，會大家一齊傾點樣拍會好啲。傾價錢講好咗個價就係嗰個價，又唔會係咁話要收附加費，記得當時我話想加航拍問佢駛唔駛加錢，Henry 就答話“駛乜啫， 話咗嗰個價錢就係架啦。”，我哋就係鐘意呢啲易話為嘅。Henry都有提議搵佢partner影埋相，我自己就覺得未必啱feel又未必係我想要嘅嘢，就不如自己再搵喇。
我段片其實有好多好難串埋一齊嘅嘢，佢都剪得好smooth，好捉到個感覺出嚟，同埋我有好多無理要求佢都幫我做到，好似我成日好多主意但係又好多變卦，又或者明明已經好趕都仲想轉啲arrangement，諗返都真係唔好意思。另外最誇張要佢哋幫我既都應該都係我航拍既要求！講返其實我揀嘅地點 (佐敦佑寧堂) 係禁飛區 ，而酒店 (Grand Kowloon Harbour Plaza)都係禁飛區～！ 當時都幾無奈同好急，因為我都真係好想要航拍既效果，咁當時Henry佢哋就唯有喺酒店出面個海皮到好低咁飛，佢哋咁就我真係唔話得，出嚟效果都非常好！
我段片影出嚟真係好滿意，當初我有好多ideas，想整到好似Star Wars咁，當日我自己prepare咗套衫同埋把劍，就著埋套西裝喺入面，影相方便啲，感覺個人又大隻啲。佢都諗咗好耐點樣match段片，而當中佢都俾咗好多意見我，始終要籌備好多嘢同埋真係好難將Star Wars同埋個婚禮串埋一齊，同埋佢有喺個場景方面同橋段上面花心思，會比較有故事性，最後佢配埋Star Wars首theme song，真係好有電影感！當日播片嘅時候好多人都話好正好好睇，我哋自己都好surprise冇諗過係咁好，Henry都真係好配合我哋，整體非常之好！我哋收到條片個包裝真係好靚，係一個好似木製嘅USB，仲刻埋我哋兩個個名，我哋自己真係冇諗過會咁tailor-made!
後來我哋好多朋友都問我哋呢間係咩公司，話佢哋都冇聽過。其實Henry佢哋咁好真係應該做多啲宣傳，始終佢哋真係得，係真係好用心做既！
June + Michael
Comments